Foi toda unha novidade e longamente esperada. Este verán un “dron” voou polos ceos das terras de Muros, da man dun muradán da parroquia de Tal; da man de Manuel Lariño, emigrante en New York e un namorado das súa terra, das súas xentes e das súas paisaxes.
Para todos ver o “dron” sobrevoar as nosas rúas e lugares, foi unha auténtica novidade. Moitos tiñan oído falar destes aparellos pero para a gran maioría era un gran descoñecido.
Manuel chámalle o seu “dron”, o “Bicho”. Mercouno nas “Américas” e non dubidou en que fora parte da súa equipaxe e traelo consigo co obxetivo de gravar dende os ceos, todas as cores das nosas fermosas terras.
O seu “dron” pode alcanzar unha altura de 1000 metros, que resultan mais que suficientes para otear unhas vistas impresionantes. O “dron” de Manuel está equipado con un estabilizador de alta precisión, que lle permite gravar sen que o aparato vibre, o que nos ofrece unha calidade única.
Para deleite de todos, Manuel publicou no Facebook, as imaxes gravadas polo seu “bicho”. Impresionantes ¡. Fomos quen de ver o todo Muros dende os ceos e con todo luxo de detalles, como nunca antes o habíamos visto. Graciñas, Manuel, polo teu traballo ¡.