p/ Xokas Figueiras
Tipo de ben: Fábrica, Porto, Institucións privadas (sés de empresas, centros sociais…),
Concello: Muros
Parroquia: Serres (San Xoán)
Lugar: Anido
Cronoloxía: Século XIX,
Descrición:
Trátase dunha fábrica de salgadura de sardiña construída por Abelardo e Felix Romaní, a edificación central ten un volume paralelepípedo ao que se lle apegan perpendicularmente distintos corpos na súa parte posterior, que configuran un rectángulo no que se dispón o patio. No corpo principal distribúense as distintas dependencias do edificio, dispostas en dúas plantas. A disposición dos vans reflicten a distribución do interior, colocándose unha galería de formigón e cristal no primeiro piso, sendo esta de construción posterior a da fábrica orixinal. Este volume de entrada destaca polo encintado da fabrica de pedra, xa que esta pintado de branco. Os outros paramentos verticais son de cachotería vista, cubríndose todo o inmoble de tella do país. Un grande espazo queda libre para adicarse ás distintas labores de fábrica da que aínda conserva varios píos, chanca e morto, no morto a técnica era de fusos de ferro e madeira. No exterior conserva dúas ramplas, un amplo patio e unha edificación cercana tamén empregada para o salgado. Tamén serviu de campo de concentración de presos asturianos, vascos, madrileños e galegos en tránsito entre agosto de 1937 e febreiro de 1938, cando estaba inactiva, albergando máis de 500 presos, estes construíron o camiño que vai da estrada xeral de O Baño ate a fábrica, nela estaban vixiados por soldados do Regimiento de Infantería “Zamora” nº 9 , mentres carabineiros e gardas civís patrullaban polo exterior. A día de hoxe emprégase como restaurante, e consérvase en bastante bo estado de conservación, quitando as edificacións anexas (na segunda foto).
Propiedade: Privada
Uso actual: ResidencialHosteleiro
Código no Catálogo da Xunta:
Categoría do Ben: Catalogado (Catálogo da Xunta e dos PXOM)
Referencias bibliográficas:
INVENTARIO DO PATRIMONIO MARÍTIMO PESQUEIRO NO ÁMBITO DAS
CONFRARÍAS DE PESCADORES DE MUROS, LIRA, O PINDO, FISTERRA E LAXE
CUSTA,Xesús SANTOS,Xesús: ‘Galiza na Guerra Civil. Campos de concentración de Muros, Padrón, A Pobra e Rianxo’
SORALUCE BLOND, José Ramón e FERNÁNDEZ FERNÁNDEZ, Xosé: «Arquitecturas da Provincia da Coruña, Carnota, Lousame, Muros, Noia, Outes e Porto do Son».
The Muros Times 