p/ Manuel Lago Alvarez

Acción Popular foi un partido político español confesional católico fundado recen proclamada a Segunda República co nome de Acción Nacional e que cambiou de nome un ano despois. Este partido foi o núcleo aglutinante da “Confederación Española de Derechas Autónomas” (CEDA).

As xuventudes deste partido chamábanse “Juventudes de Acción Popular” e foron creadas no ano 1933. Tamén se lles coñecía popularmente por “japistas” ou “camisas verdes”.

En Muros e as súas terras, tiveron bastantes adeptos. Foi moi sonado o miting que se celebrou en Muros en setembro de 1935, co que se inaugurou a “Academia de Oratoria y Círculos de estudio”, e que contou con unha afluencia masiva de afiliados e simpatizantes, e no que, segun as crónicas, predominaban “el bello sexo y el elemento marinero”.

Neste miting tomou a palabra o ex-presidente de Acción Popular don Felix Tomé Lourido, que desenrolou o tema: “Necesidad de la Academia de Oratoria y Círculos de estudio”. O orador rematou dicindo: “a Acción Popular le preocupa grandemente la formación moral, cultural y política de la juventud, para que éstos estén convenientemente preparados a fin de extender por todos los pueblos, villas y ciudades, las ideas salvadoras del partido”.

Na foto, un grupo de xóvenes muradanos membros da JAP, cos seus uniformes. Pasado o tempo, un deles, foi ordenado sacerdote, chegando a ocupar a praza de párroco dunha importante freguesía da contorna.