Presentación en Esteiro do especial TMT adicado a Don Ricardo Tobío Rama.

Fotografias: José Manuel Formoso Luces e Xosé Sendón Caamanho

O sábado 20 de decembro, The Muros Times fixo a presentación do seu número especial de decembro en lembranza de Don Ricardo Tobío Rama, recordado meritoriamente en Esteiro e a súa contorna, por haber adicado 60 anos da súa vida ao exercicio da profesión médica con notable saber e especial atención a canto doente solicitaba da súa ciencia.

O local da Sociedade Esteirana veuse ateigado dun público que sigueu con total atención as intervencións dos membros da mesa, que presidiu o Decano da Facultade de Medicina da Universidade de Santiago de Compostela, Juan Jesús Gestal Otero, xunto con Don Francisco Tobío, neto de Don Ricardo, Amador Martín, autor da biografía, a doutora Dona María Castiñeira, membro de TMT e Licenciada en Medicina, e Manuel Lago Álvarez, editor da revista dixital muradana.

Todos os oradores loaron a figura de Don Ricardo como a dun home entregado totalmente a súa profesión e aos doentes, aos que trataba con especial cariño, como si foran a súa propia familia.

A data escollida para a presentación coincidiu co corenta e un aniversario do pasamento de Don Ricardo, ocorrido o 21 de decembro de 1973. Ao remate do acto, Amador Martín , en nome de TMT, entregou a familia do recordado galeno, unhas flores para que foran depositadas na tumba de Don Ricardo.

TMT no seu afán por poñer en valor o arte, cultura, historia e tradicións de Muros e as súas xentes, publicará este ano 2015, números especiais da revista dixital adicados a Sociedade Protección Social Esteirana, co galo do centenario da súa fundación, á pesca de baixura en Muros nos anos 50-60; ao poeta i escritor Manuel da Roura, e ao médico muradán Don Antonio Beiro Uhía, falecido en 1932.