The Muros Times

En maio de 2015 vanse celebrar as eleccións municipais, Vde. se presenta como cabeza de lista do Partido Popular, contenos algo de seu perfil biográfico e humano.

Nacín en Esteiro, na Insuela, na casa de miña avoa, e son a undécima de doce irmáns. Pasei a miña infancia entre Muros e Santiago, onde estudei. Empecei a traballar moi nova, con 21 anos, en empresas relacionadas co mundo audiovisual, en Bilbao, Madrid e Santiago. Máis tarde enfoquei á miña actividade profesional ao sector público, e durante doce anos traballei en Muros en proxectos de desenvolvemento local. Actualmente traballo na Xunta, na Axencia galega de desenvolvemento rural. Estou casada cun muradán, tamén de familia numerosa, e teño tres fillos, que nestes tempos tamén son familia numerosa.

Son licenciada en dereito, xestor administrativo, teño dous posgraos, en Planificación e desenvolvemento local e en Iniciativas de emprego no ámbito local, e formación complementaria en diversas materias, principalmente xestión de fondos europeos, área na que traballo actualmente.

Gústame moito estar cos meus, a lectura, o verán, e tamén as larpeiradas.

Porqué naceu en Vde. a vocación política?

Eu máis que vocación política o que teño é vocación de servizo público, por educación, por formación e por sentimento. Penso que os principios que inspiran a xestión pública (igualdade, obxectividade, servizo ó cidadán, eficacia, transparencia e participación, boa fe e confianza lexítima…) son de aplicación tamén na política. Entendo a política como a procura do ben común, e as distintas opcións como vías diferentes para acadar o mesmo obxectivo. Cando un cargo público, ou un candidato a selo, antepón cuestións de carácter particular á busca dese ben común, fai unha perversión do sistema que nos prexudica a todos.

Antes de ser candidata participou Vde. en movementos socias?

Hai xa anos que formo parte de Intermon, e son membro de varias asociacións a nivel local, aínda que a miña participación consiste basicamente na contribución económica. Si tiven a oportunidade de traballar con moitas asociacións a nivel local, tanto en dinamización como en organización, ó que me proporciona unha visión bastante completa do sector no concello. En Muros o movemento asociativo de carácter social, cultural e deportivo é un sector moi dinámico, non así o de carácter económico e empresarial, que hai xa algúns anos está de “capa caída”, e moi necesitado de unión e de iniciativas que o dinamicen.

Cómo foi o seu nomeamento como cabeza de lista?

Hai cerca dun ano o Comité provincial do partido en A Coruña nomeoume presidenta da comisión xestora, e animada e apoiada por afiliados e simpatizantes, aceptei a proposta deste órgano para encabezar a candidatura. O certo é que me custou decidirme, xa que a situación xeral non é a máis doada para afrontar un reto como este, pero por outra parte estou convencida de que Muros precisa e merece outra forma de xestionar e facelas cousas, e se todos pechamos os ollos o deterioro no que está sumido o noso concello vai ser imparable e irreversible.

Un político, nace ou se fai?

Aínda que é certo que hai xente que xa ven “de fábrica” cunhas certas habilidades, penso que a vontade e as conviccións son fundamentais nas eleccións que fai cada persoa. A vocación de servizo á comunidade pode vir xa marcada na impronta da persoa, pero tamén se aprende, e como todo, a mellor forma de aprender é co exemplo. Nese sentido podemos considerarnos afortunados porque temos cerca bos exemplos desa vocación, que habería que poñer en valor fronte a tantas actitudes personalistas, marcadas polo egoísmo e a autocomplacencia.

Ante os casos de corrupción, cal sería a súa actitude?

Considero á corrupción como un cancro que asola a vida política e económica deste pais, e como tal debe ser tratado: extirpación e tratamento, curativo e preventivo. Pero temos que deixar de lado a hipocresía, ás veces vemos na prensa reportaxes no que se “rasgan as vestiduras” por actitudes e feitos que a propia prensa e tamén a sociedade reproduce constantemente.

Considera xusto que os emigrantes non podan votar nas municipais?

Hai emigrantes que seguen moi involucrados na vida do seu concello de orixe e hai outros que se desvinculan totalmente, por iso penso que non é fácil adoptar unha fórmula xenérica. Quizais o voto dos emigrantes debería integrar un certo compoñente de voluntariedade, ao igual que o ten o voto dos inmigrantes. O que non parece moi equitativo é que o voto de persoas non residentes en ocasións resulte decisivo á hora de escoller aos equipos que nos van gobernar, existindo outras fórmulas posibles de representación para ese colectivo.

Qué necesita o noso Concello con mais urxencia?

O que máis necesitamos é crernos que outro concello e outra forma de xestionar son posibles, deixar a un lado o medo e convencernos de que o concello é a casa de todos. En canto ás necesidades “materiais” son moitas e variadas, dende un cambio na política de atención aos veciños ata unha planificación e xestión ordenada e racional dos recursos, que atenda ás necesidades e non as conveniencias.

Cree que a política estatal ten repercusións na política local?

Creo que as decisións que se adoptan polos órganos estatais teñen repercusións directa na vida dos cidadáns, e tamén, claro está, na gobernabilidade dos concellos. En moitas ocasións a actuación dun goberno municipal está condicionada pola existencia de determinadas normas que marcan pautas de obrigado cumprimento para as corporacións, procedan da Unión Europea, do Estado ou da Comunidade autónoma. Nese sentido parece desexable que exista unha certa sintonía entre as políticas desenvolvidas polas distintas administracións.

Porqué cree que os muradáns deben votala a Vde., e non a outr@ ?

Porque non hai outra formación que sexa alternativa de goberno, que é o que o concello precisa. As políticas desenvolvidas polo goberno socialista local non atenden as necesidades do concello, non responden ás inquedanzas e preocupacións dos cidadáns, non resultan equitativas, prímase a arrogancia, a incompetencia e as malas formas. As formacións nacionalistas están pola súa parte divididas, e son incapaces de chegar a acordos entre elas, estando como están máis ocupadas en marcar as diferenzas que en buscar puntos de acordo que sexan bos para o concello.

Se queremos un concello con futuro, centrado no que importa, cun proxecto realista e realizable, que atenda aos veciños, que busque solucións para os problemas e vías para o desenvolvemento social e económico, agora temos a oportunidade, temos unha opción, votar a candidatura do Partido Popular.

Si fora elexida, que sería o primeiro que faría?

Pois o primeiro que faría sería dalas grazas, as grazas ao pobo de Muros, as grazas ao equipo que me acompaña na lista e ao partido, e as grazas á miña familia. Se os veciños de Muros confían en min para presidir a corporación, ademais de sentirme agradecida, o que espero é saber responder a esa confianza, e ser capaz de darlle a Muros tanto como Muros me dou e me da a mín.

Nesta lexislatura que remata, cal cree que foi o mellor logro que se conseguiu, e cal, o non conseguido ?

O único logro importante deste equipo de goberno foi conseguir que a arroutada se convertese en criterio de outorgamento e concesión. Pola contra non se conseguiu ningún proxecto importante para Muros. A pesar de que dende a o grupo popular tentaron chegar a acordos sobre temas de relevancia, non foi posible ir mais aló da inclusión de determinados proxectos nos plans da Deputación e reparacións puntuais.

Xa para rematar, resuma en dez liñas o seu programa electoral.

Presentamos unha proposta centrada nas persoas, na mellora da calidade de vida dos nosos veciños, mellora que hai que articular a través da atención, do diálogo construtivo, da participación e dos servizos ós cidadáns (sociais, sanitarios, educativos, culturais…); mellora que tamén vai vir da man das infraestruturas (saneamento, vías e camiños, telefonía e comunicacións…) e da protección do medio ambiente (xestión de residuos, eficiencia enerxética…). O crecemento sostible, a mellora da empregabilidade e o fomento do emprego, unha administración transparente, áxil e eficiente, a aposta polo rural, e a atención aos sectores estratéxicos da nosa economía (mar, turismo, servizos…) constitúen os elementos máis importantes da nosa proposta, e arredor dos que imos ir detallando actuacións e propostas concretas.

En maio de 2015 vanse celebrar as eleccións municipais, Vde. se presenta como cabeza de lista do partido Compromiso por Galicia, contenos algo de seu perfil biográfico e humano.

O meu nome é María Xosé Alfonso Torres,máis coñecida como María Xosé da Caseira. Nacín en 1967 en Esteiro, no seo dunha humilde familia formada por un mariñeiro e unha “ama de casa”, e despois de vivir en varios puntos de Galicia por motivos laborais, instaleime definitivamente en Esteiro onde vivo co meu home, o meu fillo e a miña filla.

Despois de cursar EXB no colexio de Esteiro e BUP e COU nos institutos de Noia e Muros, a situación económica familiar fixo que tivera que traballar para poder facer frente aos gastos que inevitablemente conleva ir á Universidade.

Despois do duro paso pola facultade de Matemáticas e da superación da correspondente oposición, na actualidade son profesora de ensino secundario no IES Poeta Añón de Outes onde tamén ostento o cargo de Xefa de estudos de nocturno.

Tiven que pelexar duramente para acadar a situación de estabilidade familiar e laboral na que me atopo, ninguén me regalou nada, por iso a transparencia e a igualdade de oportunidades é algo que defendo con firmeza.

Porqué naceu en Vde. a vocación política?

Todo comezou en 2003 cando por insistencia dun bo amigo aceptei formar parte dunha candidatura municipal . Como consecuencia diso acabei formando parte da corporación municipal, o que me serviu para aprender o funcionamento do concello e para ser consciente do moito que se pode facer dende o goberno municipal pola mellora na calidade de vida dos meus conveciños e conveciñas.

Ser consciente do moito que se pode facer, do moito que hai que facer e de que realmente se pode gobernar “co pobo e ao servicio do pobo” é o que me motiva. Muros precisa un goberno que estea ao servicio da cidadanía muradá e que a respete, non un goberno que poña á cidadanía ao seu servicio e a humille.

Antes de ser candidato participou Vde. en movementos socias?

Presidín a ANPA do colexio Ricardo Tobío de Esteiro durante 6 anos que resultaron ser moi reivindicativos e nos que se acadaron importantes logros (transporte escolar, especialista de Audición e linguaxe, obras no colexio, actividades extraescolares novidosas,….) . Isto, xunto a colaboracións frecuentes con outras asociacións como a de veciños ou comunidade de montes danme un importante coñecemento do mundo asociativo e das súas necesidades.

Cómo foi o seu nomeamento como cabeza de lista ?

Resultei elixida co 100 % dos votos nunhas primarias abertas á cidadanía, unhas primarias nas que se podía presentar calquera persoa empadroada en Muros e nas que podía votar calquera persoa empadroada en Muros. En Compromiso por Galicia non só falamos de democracia participativa tamén a practicamos.

Un político, nace ou se fai?

Nacen persoas, e logo a súa traxectoria vital lévaas a desenvolver distintas actividades ao longo da súa vida. Algunhas persoas acaban adicándose á política, pero para min a participación en política é como a participación nunha asociación, no sentido de que debe ser para o ben común. Cando unha persoa pretende vivir da política ou a costa desta, mal asunto, porque entón , para esa persoa xa van ter prioridade as súas necesidades sobre as do ben común.

Ante os casos de corrupción, cal sería a súa aptitude?

De total rexeitamento, como a de Compromiso por Galicia. Para min é imprescindible a confianza en quen goberna, e esa confianza dificilmente se mantén coas persoas imputadas.

A corrupción é unha das peores lacras, pola inxusticia que supón que mentras uns pasan verdadeiras penalidades para cumprir coas súas obrigas legais, outros se enriquezan ilegalmente ou se apropien do que non é seu. Se é moi importante loitar contra as persoas corruptas, non o é menos loitar na prevención da corrupción, daí que neste caso haxa que poñer a venda antes que a ferida e establecer mecanismos que dificulten a aparición de prácticas corruptas.

Considera xusto que os emigrantes non podan votar nas municipais?

É un tema complexo, paréceme inxusto na maioría dos casos, xa é terrible que alguén teña que marchar porque aquí non pode traballar, como para que por enriba non poida facer uso do seu voto para procurar que a situación no seu concello mellora o antes posible para poder retornar.

Pero non me parece inxusto naqueles casos nos que a persoa emigrou hai moitos anos e apenas ten vínculo co noso concello. Hai que buscar medidas intermedias.

Qué necesita o noso Concello con mais urxencia?

Son moitas as necesidades do noso concello, pero o máis urxente é ter un goberno municipal que non malgaste cartos públicos en asesores que non solucionan nada e que xestione eficazmente os recursos humanos, materiais, patrimoniais e económicos do noso concello.

Necesita que a cidadanía estea correcta e respetuosamente atendida nas súas necesidades e necesita que se traballe en promoción económica (actividades formativas, traballo ás empresas do noso concello, valorización e promoción dos valiosos recursos turísticos que temos, coidado da ría,……)

Cree que a política estatal ten repercusións na política local?

Dende logo que si, as leis e normas estatais tamén se aplican a Muros. Por exemplo, a subida do IBI durante os anos 2012 e 2013 foi por decreto do goberno estatal, e o goberno municipal de Muros aproveitou esa subida para deixala permanente a partir do 2014.

Pero non só iso, é importante un goberno municipal que antepoña os intereses da cidadanía muradá aos do partido ao que pertence, o PP de Muros mantívose caladiño cando o xulgado de Muros corría risco de desaparecer por efecto dunha lei estatal, e a cidadanía muradá ten o mesmo dereito a un bo acceso á xustiza que a madrileña.

Porqué cree que os muradáns deben votala a Vde., e non a outr@ ?

Por moitos motivos. Porque represento unha nova forma de facer política baseada no traballo, na constancia, na responsabilidade, na participación da cidadanía e nunha boa xestión, algo que xa demostrei nas miñas áreas cando formei parte do goberno municipal e nestes catro anos na oposición.

Catro anos nos que fiscalizamos o labor do goberno criticando aquilo que nos parecía perxudicial para Muros (como o gasto en asesores ou a subida da contribución); fixemos propostas en positivo como o aproveitamento dos postos libres do mercado como viveiro comercial; e votamos as propostas dos outros grupos con responsabilidade, antepoñendo o beneficio que puideran causar aos intereses partidiarios (mentras PP e PSOE se limitaron a votar en contra das nosas propostas só por ser nosas, non porque non as consideraran necesarias e boas).

Si fora elexida, qué sería o primeiro que faría?

Eliminar os gastos en asesores, levar a pleno a baixada da contribución e reorganizar aos traballadores e traballadoras municipais para ofrecer á cidadanía uns bos servicios,

Nesta lexislatura que remata, cal cree que foi o mellor logro que se conseguiu, e cal, o non conseguido ?

É difícil atopar un logro conseguido neste mandato, igual a Escola infantil, aínda que levaba anos prometida e chega tan tarde que xa moitas persoas se preguntan se non sería mellor habilitar ese servicio en instalacións do propio colexio , ao que hai que engadir a pésima xestión do goberno municipal que provocou que esta obra deixara ao alumnado do colexio de Esteiro sen pistas deportivas.

Non conseguido, por desgracia, moito: o arranxo do paseo marítimo de Esteiro, as estradas Abelleira-Paxareiras e Campo de Cortes-Louro, posta en marcha das instalacións da antigua fábrica de Sel, soterramento do cableado no casco histórico de Muros,…..

Xa para rematar, resuma en dez liñas o seu programa electoral.

Imposible resumir en 10 liñas o noso proxecto, pero aquí van algúns aspectos importantes que temos claro como acadar:

-Trato amable e eficaz coa cidadanía. Reorganización dos empregados do concello para unha mellor prestación de servicios.

-Redución de gastos innecesarios e baixada de impostos .

-Rexeneración democrática e transparencia: publicar actas, orzamentos, liquidacións,…. ; cambios nas contratacións de persoal e de empresas,…..

-Promoción económica: Especial atención e colaboración coas empresas e asociacións do noso concello; oficina de axuda a emprendedores, empresarios, comerciantes e asociacións; parque empresarial, comercio, turismo, mercado,…

-Desenvolvemento do PXOM. Eficacia e axilidade nas licencias de obras.

-Servicios sociais máis eficaces e xustos e equitativos.

En maio de 2015 vanse celebrar as eleccións municipais, Vde. se presenta como cabeza de lista do BNG – Asambleas Abertas, contenos algo de seu perfil biográfico e humano.

No BNG – Asembleas Abertas presentamos moito máis que un cabeza de lista. Somos un grupo de persoas novas na política, que entendemos que as vellas políticas só conlevan pobreza e emigración, que provimos de diversos ámbitos sociais e laborais, e que estamos dispostas a continuar o camiño comezado por Domingos Dosil no Concello de Muros. Un camiño baseado na transparencia, na democracia real e na participación cidadá. Queremos un Concello que estea ao servizo do pobo, axundando á veciñanza no seu día a día, e procurando solucións para o gran problema que ten o Concello de Muros: O Desemprego e o éxodo xuvenil. Traballaremos sen descanso no fomento de dinámicas que creen emprego, e poremos, a través dun servizo público de emprego, os mecanismos necesarios para facilitar o aceso das persoas desempregadas a procesos de selección, tanto no ámbito público como no privado.

Porqué naceu en Vde. a vocación política?

As persoas que nos presentamos na lista do BNG – AA decidimos dar o paso de asumir este reto por que somos conscientes de que ningunha outra forza pode ser garantía de Futuro para Muros. A nosa vocación nace na fartura e na necesidade de vivir nun concello realmente democrático.

Antes de ser candidato participou Vde. en movementos sociais?

A maioría dos membros da lista provimos de distintos sectores sociais, desde o asociacionismo estudantil e xuvenil, ata as asociacións culturais, deportivas e veciñais. Somos un equipo no que se recollen as distintas realidades sociais do noso municipio. En concreto, eu participei en distintas asociacións estudantís e colaborei cunha sociedade deportiva.

Cómo foi o seu nomeamento como cabeza de lista ?

Como foi sempre, no BNG-AA os membros das distintas listas elíxense asembleariamente. Neste caso concreto, a Asemblea Local do BNG de Muros abriu o proceso de presentación de candidaturas. Un membro da Asemblea propúxome a min como candidato. Ao non rexistrarse máis candidaturas, a miña candidatura única foi refrendada unanimemente pola Asemblea Local.

Un político, nace ou se fai?

No noso caso, dedicámonos á política por que estamos convencidos de que o futuro depende de nós. Se en Muros non goberna o BNG-AA, se a opción elexida polas veciñas é outra distinta a nós, só hai vellas formas, difamación, inculpacións… Se queremos futuro digno para Muros, so hai unha posibilidade de progreso e de garantía democrática: BNG – Asembleas Abertas.

Ante os casos de corrupción, cal sería a súa aptitude?

Entendemos que a corrupción é o mellor exemplo de que precisamos democracia real no concello. Co PP-PSOE non hai futuro, por que as súas políticas amparan a corruptos, ou a actitudes corruptoras. O BNG – AA eliminará a man política nos procesos de contratación de persoal, para acabar dunha vez por todas cos rumores de enchufismo e prevaricación en Muros. A transparencia e a publicidade son ferramentas imprescindibles para acabar ca dúbida nos procesos de selcción, polo que crearemos un organismo público que se encargue das contratacións de persoal laboral e manteremos totalmente ao marxe da decisión aos cargos políticos, e achegaremos á sociedade os medios necesarios para acceder a toda a información relativa ao funcionamento do día a día do Concello.

Considera xusto que os emigrantes non podan votar nas municipais?

No BNG – AA consideramos que a política municipal ten que estar en mans das persoas que diariamente, ou habitualmente, convivimos en Muros, sexa cal sexa a súa procedencia.

Qué necesita o noso Concello con mais urxencia?

Muros precisa un proxecto de goberno que asente dinámicas de creación de emprego e que se convirta nun lugar onde a nosa xuventude soñe con vivir. Muros precisa de goberno de FUTURO, que poña o Concello ao servizo dos seus cidadáns.

Cree que a política estatal ten repercusións na política local?

Ca última reforma do PP na que practicamente deixan sen liberdade de actuación real aos Concellos, queda constatado que ten moita non, demasiada repercusión. No BNG – AA apostamos por Concellos onde as persoas podan participar libremente e decidir entre todas o rumbo que debe tomar o seu municipio.

Porqué cree que os muradáns deben votalo a Vde., e non a outr@ ?

Por que nós somos futuro. Muros precisa un cambio xeracional que garantice máis democracia, a través da transparencia na xestión e do fomento da participación cidada, para rematar cas vellas prácticas políticas corruptas e desfasadas.

Si fora elexido, que sería o primeiro que faría?

O que faremos como goberno do primeiro ao último día será traballar por mellorar as condicións de vida no noso Concello. Queremos que Muros sexa o lugar onde a nosa xuventude soñe con formar o seu proxecto vital.

Nesta lexislatura que remata, cal cree que foi o mellor logro que se conseguiu, e cal, o non conseguido ?

No BNG-AA entendemos que esta lexislatura foi, de longo, a peor lexislatura desde que existe a democracia. O Goberno saínte entreganos un concello moribundo. Muros precisa dun novo equipo de goberno que sexa garantía democrática e que traballe na creación de emprego e na mellora das distintas actividades económicas que sustentan á nosa xente.

Xa para rematar, resuma en dez liñas o seu programa electoral.

Desde o BNG – AA, presentamos un proxecto de futuro para Muros que abra ás portas do Concello aos seus veciños e sexa unha ferramenta útil no seu día a día. Queremos un Concello que solucione os problemas reais dos seus habitantes, e non que sexa unha fonte constante de máis problemas e atrancos. Democracia e transparencia para rematar ca sombra da corrupción, participación cidadá, humanización das zonas urbanas, mellora dos servizos sociais, defensa e promoción da cultura propia e sobretodo, dinamización ecónomica e creación de emprego, son os principais eixos sobre os que xira o noso proxecto. Sabemos que Muros pode ser un lugar digno e fermoso para vivir, e temos as ferramentas para conseguilo. Entre todas as persoas que convivimos aquí, cun goberno aberto e participativo, podemos conseguilo. Muros ten futuro se os seus veciños poden traballar e vivir aquí. Domingos Dosil puxo en marcha os mecanismos para a creación de emprego e para facer de Muros un lugar digno para vivir. Nós daremos un paso máis, crearemos FUTURO.